KALIBO, Aklan—Nagpanindugan si Atty. Axel Gonzales nga may kinamatarong ro Pilipinas sa pagpanag-iya it isla it Sabah.
Raya hay sa pihak it pagpamilit it nasyong Malaysia nga anda ro nasambit nga isla.
Suno kay Atty. Gonzales, gintao it Sultan it Borneo sa Sultan it Sulu sa bahin it Mindanao ro nasambit nga kaeugtaan bilang pagpasaeamat.
Ko tyempo suno kana it pagdumaea ni dating Pangueong Ferdinand Marcos hay gusto kara nga daehon sa International Court of Justice ro isyu apang owa sigon naila ro Malaysia.
Raya hay bangud nga owa sanda it ebidensya ag klaro nga sakop raya it Pilipinas.
Ginhana man sigon ni Marcos nga magpadaea it kapin sa 7,000 ka mga soldado sa lugar kamana man nga nagpatigayun it “operation merdeka” para mai-take over ro Sabah.
Ko 1960’s sigon hay gintao eon it Sultan it Sulu ro sovereignty sa gobyerno it Pilipinas sa pag-eaum nga mabawi raya apang owa madayun bangud sa pagpasilabot ni dating pangueong Benigno “Ninoy” Aquino sa mga tikang ni Marcos.
Nasayuran nga nagabayad ro Malaysia sa Sultan it Sulu it kapin sa 77,000 kada dag-on bilang bayad sa renta.
Apang, napundo raya kat makaangkon it kinagamo sa Malaysia ko mga nagtaliwan nga dinag-on.
Ro Sabah hay manggaranon sa oil ukon produktong petrolyo ag 18 miles eamang ro distansya halin sa Pilipinas.
