KALIBO, Aklan—Makasaysayan ro pagtapos it pagpasakop it mga atletang Pinoy sa tumaeagsahon nga 2020 Tokyo Olympics.
Sa nakataliwan nga 97 anyos nga pag-intra it nasyon sa pinakamabahoe nga sporting event sa bilog nga kalibutan, bukon eamang ro kauna-unahang bueawan nga medalya ro nabuoe it Pilipinas kundi ro pinakamaabo kara nga medalya nga nadag-an.
Ko dag-on 1932 sa Los Angeles Olympics ukon 89 nga dag-on eon ro nakataliwan kat makatipon it tatlong medals ro nasyon sa pamaagi it mga atletang sanday Teofilo Yldefonso sa swimming nga may bronze, Simeon Toribio it athletics sa high jump ag si Jose Villanueva sa boxing nga nakabuoe it mga bronze medal.
Apang, makaron sa tunga it grabeng krisis sa pandemya may pasalubong ro mga baganihan nga atleta it nasyon nga apat nga Olympic medals kun siin ginakaeakipan raya nanday Hidilyn Diaz nga nakabuoe it gold medal sa women’s 55-kg sa weightlifting; Carlo Paalam nga may silver medal sa men’s flyweight division; Nesthy Petecio nga nakakuhit it silver medal sa women’s featherweight ag Eumir Marcial nga nag-angkon it bronze medal sa men’s middleweight class.
Sa unang kahigayunan man sa kasaysayan it Olimpiyada hay nagpanguna ro Pilipinas kontra sa mga karibal nga nasyon sa SEA Games nga ginabilog it mga Southeast Asian Nations.
