Nakaboue eon it unang bueawan nga medalya ro Pilipinas sa ginapatigayon nga 32nd South East Asian Games sa Cambodia.
Raya hay matapos nga piyerdihon ni Kaila Napolis sa pamaagi it sangka makahawat-hawat nga 2-0 nga hampang kontra sa Cambodian defending champion nga si Jessa Khan sa Women’s Newaza -52 kg Finals it Jiu-jitsu event kahapon nga adlaw it Huwebes.
Suno kay Bombo International Correspondent Vernon Moises nga presenteng nagatrabaho sa Cambodia nga raya hay apisar nga makaron nga adlaw pa eamang it Biyernes ro pormal nga pagbukas it biennial event sa nasambit nga nasyon.
Ginapahayag nga may mga pilang hampang eon ro nauna nga ginpatigayon sa katuyuan nga ma-kontrol ro mga magatan-aw sa venue partikular sa hampang nga football nga ginadagsa it mga tawo.
Angot kara, magapatigayon man it libreng tickets ro 32nd Southeast Asian Games sa Phnom Penh ag kinahangean eamang nga magpa-book sa SEA Games app.
Sa makaron, nagapanganuna ro host country nga Camcodia sa medal tally nga may kabilugang siyam nga medalya nga ginakaeakipan it limang bueawan ag ap-at nga silver medal.
Samtang, nagapangaywa man ro Pilipinas nga may una eon nga kabilugang daywang bueawan nga medalya, daywang Silver ag tatlong ka Bronze.
Ginaeauman nga pagadagsaon makaron nga adlaw it mga tumaean-aw maghalin sa nagkaeain-eain nga nasyon ro pormal nga pagbukas it 32nd South East Asian Games sa nasyong Cambodia.
