Namatay eon si Pilita Corrales nga kilaea bilang “Asia’s Queen of Songs,” sa edad nga 85 anyos.
Ginkumpirma ro masubo nga balita it anang apo nga aktres nga si Janine Gutierrez.
Gin-onga ko Agosto 22, 1939 sa Lahug, Cebu City, nagbahoe si Pilita sa sangka konserbatibo ag masoehay nga pamilya.
Sa anang kabataan, nag-eskwela imaw sa sangka finishing school sa Spain antes nagbalik sa Pilipinas bangud sa pagkamatay it anang ama.
Gin-umisahan ni Pilita ro anang career sa showbiz ko 1957 sa Australia kon sa siin sumikat ro anang kanta nga “Come Closer to Me.”
Bilang pagkilaea, ginpangaean kana ro sangka kalye sa Victoria, Australia.
Pagbalik sa Pilipinas ko 1963, nagpakilaea imaw sa radyo ag mga stage show sa Manila Grand Opera House.
Nakaangkon imaw it iconic nga TV show nga “Your Evening with Pilita” ag nakapag-record it masobra sa 135 albums sa sueod it an-om nga dekada.
Naging sikat si Pilita sa anang kakaibang estilo it pagkanta nga may kaibahan nga backbending ag mga kantang kaparehas it “A Million Thanks To You.”
Gin-aywanan kara ro anang daywang ka mga onga nga sanday Jackie Lou Blanco ag Ramon Christopher “Monching” Gutierrez ag ro anang mga apo, kaeakip si Janine Gutierrez.
