Kalibo Aklan ———–Pagkatapos it masobra sa sang domingo nga pagpatigayon it limited face-to-face classes sa Laserna Integrated School sa banwa it Nabas, owa it naging aberya ro pilot implementation kara.
Raya ro ginpahayag ni Dr. Miguel Mac Aposin , schools division superintendent it Department of Education (DepEd-Aklan).
Bangud kara, nagapakita suno kana nga posible eon ro pagbalik sa eskwelahan it mga estudyante basta nga masunod eamang ro ginplastar nga mga sueundanan.
Gindugang pa ni Dr Aposin nga owa sanda it ginhimo nga anuman nga adjustments ukon pagbag-o halin sa ginpatigayon nga simulation exercises hasta sa aktwal nga pagpatigayon it klase.
Uman nga ginpasaeamatan it ahensiya ro mga opisyal it Barangay, LGU, ginikanan ag iba pang mga stakeholders sa kadaeag-an it face to face classes sa banwa it Nabas.
Pagkatapos it set A hay gina-obserbahan nanda makaron ro set B it mga learners para sa ikaywang domingo it klase.
Nasayuran nga ro eskwelahan hay nag-obra it mga improvised plastic barriers ag nagbutang it mga signages para sa tamang entry ag exit sa mga classroom.
Gina-check man ro temperature it kada estudyante antes nga pasudlon agud nga masiguro nga owa sanda it sintomas it COVID-19.
Mga learners halin sa kindergarten ag Grade 1 hasta Garde 3 ro nagpasakop sa pilot implementation it face to face classes nga gintunga sa daywang grupo nga nagabueos-bueos pagkatapos it tig-sang domingo nga klase.
Ro Laserna Integrated School hay sambilog sa tatlong public school sa bilog nga Western Visayas ro kaibahan sa limited face-to- face classes nga nag umpisa ko Nobyembre 15.
