KALIBO, Aklan—Naging madinaeag-on ro unang adlaw it pilot implementation it limited face to face classes sa Laserna Integrated School sa banwa it Nabas makaron nga adlaw it Lunes, Nobyembre 15 sa tunga it Covid-19 pandemic.
Matapos ro haeos daywang dag-on, uman nga nagbalik sa eskwelahan ro pilang mga learners.
Nasayuran nga sa masobra sa 100 nga mga public schools nga gin-aprubahan it Department of Education agud nga maging kaparte it limitadong klase sa pilang pili nga lugar, partikular sa mga low risk area, maswerteng naka-ibahan kara ro eskwelahan sa Nabas.
Kaibahan man raya sa tatlong eskwelahan halin sa Western Visayas.
Base sa rekomendasyon it DOH, makaangkon eamang it sang domingo nga face-to-face classes ro kindergarten ag grade 1 hasta grade 3 nga learners ag sang domingo man nga owa it klase ukon paga-obrahon nga bueos-bueos.
Samtang, masadya nga ginsug-aeaw ro mga estudyante it Laserna Integrated School it andang mga manugturo halin sa gate it eskwelahan hasta sa andang natungdan nga classroom.
Antes nga makasueod sa klase, kinahangean nga mag-agi ro mga estudyante, manugturo ag iba pang opisyal sa washing area, temperature checking, ag triage area agud nga masiguro ro kaeowasan it tanan.
