Ginkoronahan ko nagtaliwan nga Hunyo 25 ro ayam nga si Mr. Happy Face it titulong ‘The Ugliest Dog in the World’!
Ro World’s Ugliest Dog Contest hay dag-unan nga contest nga ginapatigayon sa Petaluma, California bilang kaparte it Sonoma-Marin Fair.
Gin-umpisahan ro nasambit nga tradisyon ko1970s agud nga makatipon it kwarta nga iga-donate sa mga charity sa Petaluma.
Bukon it pagsura ro tuyo it contest kundi kabaliskaran sa nakasanayang dog shows kun sa siin mga pure breed eamang ro ginabaton sa contest.
Suno kay Ross Smith nga founder it contest, gin-obra nana ro contest agud nga ma-appreciate ro mga ayam nga owa it breed.
Mag-eowas kara, ro adbokasiyang ginaduso it contest hay ro mag-ampon it ayam imbes nga magbakae sa mga petshop ukon breeders.
Bangud sa COVID-19 pandemic, daywang dag-on nga na-postpone ro World’s Ugliest Dog Contest rason nga gina-abangan it mga dog lovers sa California ro pagbalik it contest .
17 nga ayam ro nabaton bilang finalist sa titulong World’s Ugliest Dog apang ro nagpangibabaw sa tanan hay si Mr. Happy Face, sangka hairless Chinese crested-Chihuahua mix.
Nakabaton it cash prize nga $1,500 dollars ag all expense paid trip to New York City si Mr. Happy Face ag ro anang fur parent nga si Jeneda Benally
