Namatay eon si Sister Inah Canabarro, sangka Brazilian nga madre ag manugturo nga ginakilaeang pinakamagueang nga tawo sa kalibutan, sa edad nga 116-anyos.
Suno sa anang kongregasyon, namatay si Sister Inah ko Miyerkules sa anang panimaeay sa Porto Alegre, Brazil bangud sa natural nga rason.
Ginkumpirma ko Enero it grupong LongeviQuest nga si Sister Inah ro pinakamagueang nga tawo sa kalibutan antes ro anang pagkamatay.
Imaw kunta hay maga-selebrar it ika-117 kaadlawan sa Mayo 27. Sa makaron, naisaylo eon ro titulo bilang pinakamagueang nga tawo sa kalibutan kay Ethel Caterham nga 115-anyos it Britania.
Sa sangka video ko Pebrero 2024, ginpakigbahin ni Sister Inah nga ro anang madaeom nga pagtu-o sa Katoliko ro yabe sa anang mahaba nga kabuhi.
Nagselebrar imaw it anang ika-110 kaadlawan kaibahan si Pope Francis.
Pagahiwaton ro eubong ni Sister Inah sa Huwebes sa Porto Alegre.
