Balitang Espesyal———-Ginkilaea bilang pinakamahae nga salampati sa bilog nga kalibutan ro two-year-old racing pigeon nga si New Kim matapos imaw nga madag-an sa sangka online auction sa balor nga $1.9 million dollars!
Kan-o eamang, ginpasubasta it world renowned pigeon breeder nga si Hok Van De Wouwer ro koleksiyon nana it mga racing pigeon.
Kilaea si De Wouwer sa Antwerp Belgium bilang de-kalibreng breeder it mga salampati nga nagdaog it mga national race pigeon titles rason nga maabu ro gustong mag-bid sa anang mga racing pigeon.
Apang ginkakibot sa gihapon it kaabuan kat ma-break ni New Kim ro world record sa pagiging pinakamahae nga salampati.
Sa sueod eamang it sang oras ag tunga matapos umpisahan it Pipa Pigeon Paradise website ro online auction, nakabaton eagi it 226 bids si New Kim.
Matapos ro ap-at nga adlaw it bidding, sangka collector halin sa China ro nagdaog sa subasta sa balor nga $1.9 million dollars.
Sa sobrang mahae it kantidad ni New Kim, sangka security company ro ginmanduan nga bantayan imaw samtang ginahueat nga mabo-oe it anang bag-ong amo.
