ginpaguwa eon sa merkado it Kokenawa Inc. ro andang imbensiyon nga Pocketoilet, ro ginakabig nga ‘‘World’s Smallest Portable Toilet’’!
Ro Pocketoilet hay may sukat nga 7 cm x 6.5 cm ag maka-igo raya sa bag, wallet ag boesa.
Ko 2019, nakaangkon it ideya si Yoshinori Konekawa, ro founder it Kokenawa Inc. nga mag-imbento it portable toilet matapos imaw nga mag-volunteer sa Nagano Prefecture nga nadaeasa it bagyong Hagibis.
Unang nakita nana nga problema it evacuees ro mahabang pila sa mga portalet.
Sa sobrang haba it pila, naga-abot it 30 minutos hasta sang oras ro ginabuhay agud eamang nga makagamit it toilet.
Rason nga ko December 2020, ginlunsar it anang kompanya ro Pocketoilet.
Ro Pocketoilet hay sangka bag nga himo sa special, durable fibers nga may sueod nga coagulant.
Pwedeng ibutang sa toilet seat ukon trash can ro bag agud nga madaling masaeap kara ro higku.
Suno kay Yoshinori, indi mahumgan ro mabahong hugum it higku nga una sa bag bangud sa coagulant chemicals kara.
Sa makaron hay nakabaligya eon ro andang kumpanya it 50,000 Pocketoilets ag nakapag-donate eon sanda it 6,000 pcs. kara sa Ukraine kun sa siin presenteng may giyera.
