KALIBO, Aklan–Naga-abot sa 1,056 ro numero it mga turistang nagabisita sa isla it Boracay sa unang adlaw nga ginpasugtan eon ro paggamit it saliva RT-PCR test.
Suno kay Felix Delos Santos Jr., head it Malay Municipal Tourism Office, mas mataas ro nasambit nga numero kumpara sa tourist arrivals ko March 13 nga kapin sa 967 eamang.
Raya sigon ro pinakamataas nga tourist arrival nga nailista umpisa nga ginbuksan ro isla sa domestic tourist ko Oktubre it nagtaliwan nga dag-on.
Ro mga turistang halin sa National Capital Region (NCR) sa gihapon ro nagapangunang bisita sa Boracay.
Madumduman nga matapos nga magpaguwa it advisory si Aklan Governor Florencio Miraflores ko Marso 19, naging epektibo ro paggamit it mas barato ag mas madasig nga saliva COVID-19 test bilang alternatibo sa swab test.
Antes nga ginpasugtan ro saliva test sa isla, may average nga 700 kada adlaw ro mga turistang nagabisita idtu.
Dugang pa ni Delos Santos, ‘very promising’ ro mga datos ag nagaeaum nga magabuhos pa ro mga turista sa masunod nga mga inadlaw.
Umpisa Marso 1 hasta 21, naga-abot eon sa 16,412 ro kabilugang numero it mga bisita.
