KALIBO, Aklan—Nagapati ro sangka professor ag political analysts sa probinsiya it Aklan nga ro pinaka-ulihi nga survey it pulse asia ro magiging resulta it paeaabuton nga eleksyon sa maabot nga Mayo 9.
Suno kay Dr. Malen Villanueva nga base sa kasaysayan it pulse asia hay owa man sanda pumalpak sa andang mga surveys.
Mag-eowas kara, ro kandidato sigon nga nagapanguna hay owa man nagnaba ro anang ranking umpisa pa ko una.
Sa pihak suno kana nga may mga tagasuporta nga hayagan ro andang pagpahayag it igaboto nga kandidato, apang may pila nga mahipos eamang, kun sa siin may naka-fix eon sanda nga desisyon kon sin-o nga kandidato ro andang igaboto.
Nasayuran nga si dating senador Ferdinand “Bongbong” Marcos Jr. ro nagpanguna sa presidential race maskin nga nagsaka it sangkiri ro anang hugut nga karibal nga si Vice President Leni Robredo base sa pinaka-ulihi nga survey it Pulse Asia Research Inc.
Ro unga it dating diktador hay ginpaburan it 56% it respondents, mas manaba sa 60% nga nabo-oe kara ko Pebrero samtang si Robredo hay nakabo-oe it 24%, ukon may pagsaka it 15% halin sa dating resulta.
Third-placer si Manila Mayor Isko Moreno nga may 8%.
Ro survey it 2,400 nga respondents sa bilog nga nasyon hay ginpatigayon ko March 17 hasta 21.
