KALIBO, Aklan – – – Gin pasarado it Local Government Unit (LGU) Malay ro sangka Chinese Hotel and Restaurant sa front beach it Station 2 sa isla it Boracay matapos makitaan it pag eabag sa sanitation.
Raya matapos matukiban it Task Force Hawan nga naga pilak sanda it kitchen waste maeapit sa baybayon.
Sa gin patigayung imbestigasyon, nasayuran nga owa sanda it sanitation permit maghalin pa ku nagtaliwan nga dag-un.
Owa man it health certificate ro andang mga empleyado ag mahigku ro andang kusina.
Ro nasambitang establisiemento hay gina panag iyahan it sangka Chinese businessman.
Sa makaron hay naga padayun sa gihapon ro maidid nga demolisyon sa mga iligal nga istraktura sa isla nga nakitaan it mga pag eabag sa environmental laws.
Raya hay bilang pagtuman sa mandu ni Pangueong Rodrigo Duterte nga ibutang sa ayos ro Boracay sa sueod it an-um nga buean nga palugit kara.
