Nabuoe it Pilipinas ro best diving destination award sa 2024 Diving Resort Travel (DRT) Show sa Beijing, nga kumilaea sa kanami it nasyon bilang sangka premier dive spot.
Suno sa Department of Foreign Affairs (DFA), nabuoe it nasyon ro titu-eo kaibahan ro Best Tourism Promotion Partnership Award sa nga dive event halin Agosto 1 hasta it 4.
Ro DRT ro ginakabig nga pinakamabahoe ag pinakaepektibong “dive exhibition platform” sa rehiyon, nga nag-akit it masubra sa 450,000 propesyonal nga konsumidor ag bisita halin sa 65 nga ka nasyon ag rehiyon sa bilog nga kalibutan kada dag-on.
Suno kay Philippine Ambassador to China Jaime FlorCruz, ro diving hay nagtao it masubra P73 bilyon sa turismo it Pilipinas ko 2023 nga daywang beses nga kinita ko 2022.
Ginpangunahan it DOT office sa Beijing ro pag-intra it nasyon sa DRT ag ginkaeakipan it indi magnaba sa 12 Philippine-based dive shop, resort ag liveaboard.
Nauna kara, nga gin-anunsyo it Department of Tourism (DOT) ro planong magtukod it kadugangan nga limang hyperbaric chamber sa mga nagapanguna nga dive destination sa nasyon kaibahan ro Puerto Galera sa Oriental Mindoro, Boracay, Cebu, Negros Oriental, imaw man sa Camiguin nga kadugangan sa nagairal nga 15 ka lugar sa bilog nga nasyon.
Sa makaron, ro Philippine Commission on Sports Scuba Diving hay nakabilog ag nag-audit it indi magnaba sa 120 dive destination sa nasyon.
