KALIBO, Aklan—Sigurado eon ro sambilog pang medalya nga mabuoe it Pilipinas sa nagapadayun nga 2020 Tokyo Olympics matapos nga umusad eon sa semifinals ro Filipina boxer nga si Nesthy Petecio.
Raya hay matapos nga pyerdihon ni Petecio si Yeni Arias it Colombia sa women’s featherweight quarterfinals nga gindihon sa Kokugikan Arena sa Tokyo, Japan.
Suno kay Bombo Samurai Correspondent Josel Palma nga maskin mapyerdi pa ro Pinay boxer hay sigurado eon man ro anang pag-angkon it Olympic bronze medal.
Una kara, maskin nga naging agresibo si Arias owa man raya umubra sa mga ginbuhian nga bayo ni Petecio sa unang round it hampang.
Nagdaog si Petecio matapos imaw nga paburan it mga judges sa pamaagi it unanimous decision.
Makasambuwa it Pinay boxer ro pambato it Italy nga si Irma Testa sa maabot nga adlaw it Sabado.
Si Petecio hay 2019 world champion ag rank number 7 sa world featherweight division.
