Daog ro pambato it Pilipinas ag Bombo International Correspondent nga si Ma. Edsel Lamparero Lopez it Spain sa Seniora Belleza International Espanya nga ginpatigayon ko domingo nga adlaw sa Madrid.
Ginpierde it nasambit nga Pinay nurse ro mga contestants sa beauty pageant nga halin sa nagkaeain-eain nga parte it kalibutan partikular sa Latin-America.
Suno kana nga hasta sa makaron hay matsa sa cloud 9 pa imaw matapos nga owa ginaeauman ro pag angkon it titulo.
Beterana eon sigon imaw sa mga beauty contest kat iya pa imaw sa pilipinas hasta nga naka abot sa espanya hay padayun ro anang pagpasakop, apang kaeabanan nga owa nabobo-oe ro titulo.
Naging kabado pa sigon imaw bangud nga ro Q and A hay espanyol, apang nasabat nana it ensakto.
Mag-eowas kara, imaw man ro nakabo-oe it special award nga Senora Social Media award matapos nga humakot it maabu nga mga likes ro anang tiktok video.
Madumduman nga raya ro kauna-unahan nga kahigayunan nga ginpasugtan it organizer nga makapasakop ro Pilipinas nga kaeabanan nga gina-intrahan it mga nasyon nga halin sa Latin-America ag Spain.
Ginbase ro pagpili sa mga contestants sa andang kasikatan sa social media ukon maabu nga followers ag may background sa beauty contest.
Si Lopez hay sambilog sa may maabu nga followers sa Madrid facebook page.
