Ginboesa ni Filipino pole vaulter ag Olympian EJ Obiena ro bueawan nga medalya sa 6th Irena Szewinska Memorial sa Bydgoszcz, Poland.
Nahimo ni Obiena nga abuton ro 5.97 meters nga season-best it Pinoy vaulter.
Si Obiena hay presenteng world No. 3 ag nahimo nana nga pyerdihon ro pilang mga mayad nga pole vaulter nga ginakaeakipan nanday Greek athlete Emmanouil Karalis, nga umabot sa 5.92 meters nga nakuhit ro silver medal ag ro 3rd placer nga si Piotr Lisek nga nag-eokso it 5.75 meters.
Si Lisek hay ro pambato it Poland kon sa siin ginpatigayon ro turneyo.
Samtang, ro masunod nga hampang ni Obiena hay nakataeana makaron nga adlaw para sa Czesław Cybulski Memorial nga igapatigayon sa Poznan, Poland.
Nauna eon nga ginpahayag ni Obiena nga tapuson anay nana ro mga nakataeanang hampang sa nagkaeain-eain nga parte it nasyon antes ro daeayon nga pagpahuway ag pag-umpisa sa anang mahaba-habang training para sa Paris 2024 Olympics.
Nakataeana ro Paris Olympics halin July 26 hasta it August 11.
