KALIBO, Aklan—Mismong pirma eon lang ni Pangueong Ferdinand Marcos Jr., ag magiging laye eon ro “Kabalikat sa Pagtuturo Act” nga ginaduso ni Senator Ramon “Bong” Revilla Jr.
Suno kay Alliance of Concerned Teachers ukon ACT partylist spokesperson Vladimir Quetua nga nag-eosot eon ro nasambit nga proposisyong laye sa Bicameral Conference Committee.
Bangud kara, nag-adto pa sa Senado ro mga organisasyon it mga manugturo kaparehas it Alliance of Concerned Teachers (ACT), Teachers Dignity Coalition, ag Philippine Public School Teachers Association agud personal nga pasaeamatan si Revilla, ro nagadumaea sa Senate Committee on Civil Service, Government Reorganization and Professional Regulation.
Suno kanda, ko 16th Congress pa kat ginhirit nanda ro pagtaas it andang teaching allowance ag makaron hay 19th Congress eon.
Nauna eon nga ginpahayag ni Revilla nga raya hay pagkilaea ag pagpahalaga sa kadakilaan it mga manugturo.
Ginpahayag dugang ni Quetua nga ro P5,000 Teaching Allowance it mga manugturo sa makaron hay madoble sa P10,000 kon maisalaye eon ro nasambit nga hagna.
Mag-eowas kara, nagahueag eon man sigon ro proposisyon nga nagatuyo nga taasan ro sweldo it mga public schools teachers sa P50,000 kada buean.
Madumduman nga nauna eon nga nagdihon it House Bill 9920 sanday ACT Teachers Representative Francisca Castro, Gabriela Party-list Representative Arlene Brosas ag Kabataan Party-list Representative Raoul Danniel Manuel nga nagatuyo nga i-upgrade ro suweldo it mga manugturo halin sa Salary Grade 11 hasta Salary Grade 15.
Raya hay matapos nga ro presenteng suweldo it mga manugturo hay bukon it bastante para mapun-an ro family living wage nga P1,119 kada adlaw ukon P33,570 kada buean.
