KALIBO, Aklan—Pito ka mga indibidwal ro temporaryo makaron nga una kustodiya it pulisya matapos nga madakpan sa pagpatigayon it illegal nga pagbueo-bueo bandang ala-una it hapon sa Brgy. Aquino, Ibajay.
Ginkilaea ro mga naaktuhan nga sanday Aldrich Bantang, 39-anyos; Roland Dela Cruz, 39-anyos; Jhon Torseta, 34-anyos, Welfi Colanggoy, 31-anyos; Resilva Dalisay, 33-anyos, Rex Batoy, 41-anyos ag Apollo De Jose, 47-anyos ag parehong residente it nasambit nga lugar.
Una kara, nakabaton it report ro Ibajay PNP maghalin sa sangka concerned citizen nga may nagapatigayon it pagbueo-bueo sa nasambit nga lugar kon siin sa pagberipika it mga otoridad hay naaktuhan ro pito samtang ro iba hay madasig nga nakadaeagan.
Narekober sa lugar ro daywang bilog nga buhi nga manok nga pambueang, bueang ag kapin sa P1,570 nga kantidad it kwarta nga ginamit bilang taya.
Ro nasambit nga mga indibidwal hay insigida man nga gindaea sa taeatapan it pulisya ag posibleng magapangatubang sa kasong pag-eabag sa Presidential Decree 449 ukon Illegal Cockfighting Law.
