Pitong katawo ro naeowas matapos magtik-eob ro motorboat nga “SAN AGUSTIN IV” sa kaeawran maeapit sa Liwagao Island, Caluya, Antique ko Setyembre 6, 2026.
Sambilog mat-a ro naireport nga namatay sa insidente.
Suno sa Philippine Coast Guard, bumiyahe ro motorboat halin Semirara Port ko Setyembre 5 paadto it Barangay Caminawit, San Jose, Occidental Mindoro.
Matapos raya nga uwa makaabot sa destinasyon ag mawad-an it komunikasyon ro mga sakay, eagi nga gin-report it tag-iya ro insidente sa PCG.
Nagpatigayon it search and rescue operation ro Coast Guard Sub-Station San Jose ag ko ulihi hay nakit-an ro nagtik-eob nga motorbanca maeapit sa Barangay Sibulo, Liwagao Island, kon sa siin nakit-an ro mga indibidwal nga nagakapyot sa kilya it sakayang-pandagat.
Gilayon nga ginhimo ro rescue operation ag gindaea ro mga nakaeowas sa Pinagpala Port sa Barangay Semirara para sa medical evaluation ag dugang nga bulig.
Samtang, gin-umpisahan ro towing operation sa nagtik-eob nga motorboat paadto sa Semirara Island.
Uman nga nagpadumdom ro PCG sa mga biyahero ag operator it sakayang-pandagat nga maging madahan, bantayan ro daeagan it panyempo ag siguraduhon nga kumpleto ag maayos ro mga safety equipment bago bumiyahe sa dagat.
