KALIBO, Aklan — Hugut nga nagapamaeabag ro Piyan anwang ukon grupo it mga Aklanon nga dating seminarista it St. Pius sa ginaproponer nga proyekto nga tulay sa sikat nga Boracay Island.
Suno kay 1st district provincial board member Apolinar Cleope, tagpaghambae it nasambit nga grupo nga nagabuylog sanda sa iba pang sektor sa pagkontra sa planong construction it tulay nga magakonekta sa Isla it Boracay ag mainland Malay.
Ginpahayag nga ro Boracay bridge hay sangka unsolicited proposal kun sa siin owa it sin-o man nga local government units ukon ahensiya it gobyerno nga nagpangayo kundi nga ginduso it sangka pribadong kompaniya nga sanda ro maga-obra it proyekto.
Ro San Miguel Corporation nga imaw ro nagpropose it proyekto hay owa pa it opisyal nga pag-endorso halin sa provincial government it Aklan ag sa LGU-Malay para sa andang unsolicited proposal nga ipatindog ro tulay.
Gin-insister ni SP member Cleope nga ro tulay hay makaangkon it negatibong epekto sa kabuhi ag pangabuhian it mga residente kamana man it mga tawo nga nagsaylo sa isla agud nga mag-usoy it trabaho partkular ro mga motorbanca operators ag mga empleyado kara.
Dugang pa nga mag-eowas sa socio economic impact, nagakabaeaka man sanda sa posibleng maeain nga epekto it tulay sa maselan eon nga kahimtangan it kalikasan sa Boracay.
Ro nasambit nga kompaniya man suno kana ro nagadumaea makaron sa operasyon it Caticlan airport nga makabig nga pigaw man bangud nga maskin nga terminal hay owa nanda napa-obrahan hasta sa makaron.
Matsa nagapamentaha eamang suno kana ro kompaniya. Maskin nga mabahoe ro posibilidad nga madayun ro proyekto, apang indi nanda raya maduso bangud sa kawad-an it konsultasyon.
Angot kara, nagapanawagan sanda sa mga lokal nga opisyal nga uman nga isipon ro andang panan-awan, pati man ro baeatyagon it iba pang stakeholder.
1st district provincial board member Apolinar Cleope ag tagpaghambae it grupong Piyang anwang
