KALIBO, Aklan—Ginbatikos ni Antique Governor Rhodora Cadiao ro plano it Department of Health nga magpatigayon pa it contact tracing ag pag-isolate sa mga nakasalamuha it mag-asawa nga tinamaan it delta variant it covid 19.
Suno kana nga useless eon ro tikang bangud nga ro Delta variant nga tumama kanda hay bukon eon it bag-o
Suno pa kay Cadiao nga amat-amat eon nga nakakabangon ro ekonomiya sa western visayas rason nga owa sanda naila nga kaibahan ro iba pang gobernador it kaiping nga probinsiya nga mapasaka it uman ro presenteng quarantine classification.
Nasayuran nga mag-eowas sa siyudad ag probinsiya it Iloilo nga ginpaidaeum sa Enhanced Community Quarantine ukon ECQ, ro Aklan, Antique ag Negros Occidental hay parehong una sa general community quarantine ukon GCQ.
Samtang, ro importante suno kana hay mapadasig ro pagrolyo it bakuna makaron ag indi eon pagtutukan ro RT-PCR testing ag contact tracing.
Madumduman nga ro mag-asawa nga nakitaan it delta variant hay kaibahan sa 16 nga bag-ong Delta variant cases nga gin report it DOH, Philippine Genome Center, ag University of the Philippines – National Institutes of Health.
Ro mag asawa hay parehong senior citizens nga owa pa nabakuhan.
Nakaangkon sanda it sintomas ko Mayo 27 ag naging positive sa sakit ko Mayo 29.
Ro andang specimens hay gindaea sa PGC para sa genome sequencing ko June 11 ag ro resulta hay nagguwa ko Biyernes eamang, Hulyo 16.
Ro misis nga may gina angkon nga type 2 diabetes hay namatay ko Mayo 31, 2021.
Nagbuhay sigon it masobra sa sang buean ro pagpaguwa it resulta bangud sa bulto it mga specimens nga gina-examine.
