Nagpatigayon it puoeng ro mga miyembro it wet market partikular ro Fish Vendors Association nga tuyo nga matipon ag maistoryahan ro tanan nga problema ukon concerns it mga manugbaligya.
Suno kay Rosalia Tampos, Fish Vendors Association President, nga uwa man sigon nanda ginapamaeabagan ro nasambit nga relokasyon apang hinyo eamang nanda sa mga opiyales nga kung ihalin gid man sanda hay kunta tanan nga mga vendors ro irelocate sa sangka lugar agud matawag gid nga market.
Aminado man imaw nga kon maisot ro relocation site hay malisod gid ro sitwasyon rason nga suhestiyon nanda nga kung indi gid tanan sanda mag-igo sa site hay mas mayad nga una lang anay sanda sa access road ukon sa libot it tindahan samtang gina-ubra pa ro merkado publiko.
Raya hay kabaliskaran sa plano ni SB Member Ronald Marte nga igabutang ro mga dry market vendors sa temporaryong igapasarado nga Toting Reyes St. ag ro mga wet market vendors hay ihalin sa likod it Eastern Terminal.
Pahayag pa ni Tampos nga bukon kanda it paborable ro nasambit nga plano.
Hinyo eon lang nanda nga kung indi gid man mag-igo sa relocation site hay sa guwa eon lang it tindahan sanda ipwesto tanan.
Nagakabaeaka sanda nga uwa haeos it magbakae kanda kung ihalin sanda it separado sa dry market.
Mag-eowas kara bangud sa kaabuon sigon it mga illegal vendors hay posibleng maghimo pa sanda it talipapa sa mga gilid it daean.
Magadihon ro nasambit nga grupo it sueat kay Mayor Juris B. Sucro eakip ro mga gin-istoryahan nanda sa natapos nga pueong pati man ro mga petition it mga vendors sa parehong dry ag wet market.
