KALIBO, Aklan—Plano it Aklan Provincial Government nga i-convert ro Philhealth ag Isolation ward sa Dr. Rafael S. Tumbukon Memorial Hospital (DRSTMH) bilang COVID ward ag COVID ICU.
Raya hay para masiguro nga makaangkon it bastanteng pasilidad ro probinsya engkaso nga uman nga maglobo ro kaso it COVID-19 infection sa tunga it paeag it Omicron variant.
Magabuoe sigon sanda it kapin sa P100,000 nga pondo halin sa Local Disaster Risk Reduction and Management Fund kamana man nga iga-sueod raya sa Suplemental budget it 2022.
Nagapati ro mga opisyal nga mabahoe ro maibulig it natungdan nga pasilidad sa padayun nga pakikipagsukoe it probinsya sa pandemya.
Samtang sa pihak nga parte, gintalakay sa ginpatigayun nga session it mga miyembro it Sangguniang Panlalawigan it Aklan ro pagpaiway sa pagsukot it mga soul charges sa mga real property tax payer halin 2018 hasta 2021.
Nakabaehag kara nga ginapasugtan eon it gobyerno probinsyal ro indi pagbayad it interes ukon penalidad it mga tax payer sa nasambit nga panyempyo basta mabayaran eamang ro andang remaining balance hasta Marso 31, 2022.
Mabahoe raya nga ginhawa para sa mga pumueoyo eabi pa ag padayun kita nga nagapangutabang sa pandemya.
