KALIBO, Aklan–Plano it sangka pamilya nga magpasaka it nagakaigo nga kaso sa branch manager it sangka money remittance center ag sa tawo nga nag-claim it andang ginpadaea nga kwarta.
Suno kay Mr. Jet Pastrana it banwa it Altavas nga ko buean it Pebrero hay nagpadaea imaw it P50,000 kay Mrs. Evelyn Abello it Purok 2, C. Laserna St. Kalibo bilang kaparte it bayad sa utang it anang ina.
Apang nagbuhay pa it daywang domingo antes nga gin-claim ni Abello ro kwarta, kun sa siin, eubus ro anang kakibot kat ginhambae kana it staff it nasambit nga money remittance center sa andang Osmena Avenue branch nga natigayon eon raya nga ma-claim.
Nagpanindugan man si Mr. Pastrana nga owa imaw it ibang gintaw-an it tracking number it kwarta nga anang ginpadaea.
Bangud kara, gina-kwestiyon nana ro kompaniya kon ham-an nga owa masyadong gin-verify ro pagkatawo it nag-claim nga gina-alegar nga nag-presentar eamang it sangka identification card nga gin-isyu it Philhealth.
Gindugang pa kara nga indi imaw ma-pwersa ni Abello nga magbayad it uman it P50,000 bangud nga may nagakaigo imaw nga pruweba nga nakapadaea imaw it nasambit nga kantidad.
Ginareklamo pa kara ro medyu pagbalewala it kompaniya sa andang concern.
Indi man nana mahambae kon may nagakatabu nga kunchabahan ukon sangka klase it inside job ro natabu kanda.
Pilang beses eon sigon sanda nga nakapadaea it kwarta kay Mrs. Abello nga gin-claim man sa nasambit nga branch rason nga dapat nga may nagakaigo eon sanda nga record it transaksyon.
Samtang, ginlaygay eon lang ni pastrana sa mga pumueuyu nga mas mayad nga kon nagapadaea it kwarta nga medyu mabahoe ro amount hay mas mayad nga ipa-agi lang raya sa bangko.
