KALIBO, Aklan—Posibleng sa masunod nga dag-on eon pagapasugtan ro planong pagbaton it mga foreign tourist sa isla it Boracay.
Suno kay Aklan Governor Florencio Miraflores nga bangud sa bag-ong UK variant it Coronavirus hay kinahangean ro dobleng pagdahan.
Nauna eon nga gin-anunsyo it Department of Health nga kapin sa 62 nga mga pinoy nga kaabuan hay mga nag-uli nga Overseas Filipino Workers (OFWs) ro nagpositibo sa UK variant.
Gindugang pa it gobernador nga haum eon kunta ro tanan nga mga pasilidad it probinsiya sa pagbukas it Boracay sa mga dumueuong nga turista.
Ginpabugae pa kara nga umpisa nga ginbuksan ro Boracay sa domestic tourists ko oktubre it nagtaliwan nga dag-on, owa pa sanda it may nailistang nakaangkon it Covid-19 pagkatapos it andang bakasyon sa Boracay.
Ro mga naispatan sigon nga pilang mga foreign tourists sa isla hay mabuhay eon nga naga-istar sa nasyon.
Sa ginpaguwa nga monthly report it Malay Tourism office umpisa pebrero 1 hasta 23, nakalista sanda it 12,432 nga mga turista.
Ro National Capital Region (NCR) ro top source it mga turista nga naga-abot sa masobra sa 8,000.
