KALIBO, Aklan—Kasunod sa plano nga nabilog it mga opisyales it Aklan sa ginpatigayon nga pueong ko nagtaliwan nga adlaw, nagta-o raya it excitement ag kalipay sa mga negosyante kon sa siin sambilog sa andang ginaproponer hay ro pagbukas it mga restaurants, bars, pubs, hubs partikular sa front beach.
Apang, ginklaro ni Malay mayor Frolibar Bautista nga ro pasugtan eamang nga makabukas hay ro kumpleto sa mga dokumento nga nauna eon nga ginrequired it Department of Tourism ukon DOT.
Nasayuran nga hugot nga igapatuman ro “No Certification, No Operate Policy” sa mga establisyimento nga gustong magbukas sa tunga it pandemya.
Ginpahayag dugang ni mayor Bautista nga ro plano it lokal nga gobyerno ag maging it gobyerno probinsyal hay agud nga mapabangon ro ekonomiya it probinsya pinaagi sa industriya it turismo kon sa siin ro isla it Boracay ro mabahoe nga source it income it Aklan.
Engkaso sigon nga pasugtan ro andang proposisyon hay insigida sanda nga magapatigayon it information dissemination kamana man promotional activity agud nga masayuran it tanan ro uman nga pagbukas it Boracay bukon eamang it samga turista it Western Visayas kundi maging sa mga international nga mga bisita.
Nasayuran nga nagapabilin nga eowas sa coronavirus disease ukon Covid-19 ro isla kon sa siin hugot sigon nanda nga ginapatuman ro minimum health standards agud nga ma-maintain ag ma-sustain ro nasambit nga estado.
