KALIBO, Aklan—Ginakabaeak-an it mga tagasuporta ni US President Donald Trump nga ro planong pagpaeapad pa sa postal voting para sa nagahilapit nga eleksyon sa Amerika sa November 3 hay posibleng magresulta sa maeapnagon nga daeayaan.
Suno kay Bombo International Correspondent Alvin Mobo, residente it Capitol Subdivision, Kalibo, Aklan ag haeos 20 anyos eon nga naga-trabaho sa New York, USA nga mas grabe pa ro dayaan kada eleksyon sa amerika kumpara sa Pilipinas.
Ginagamit eamang sigon nga rason ro Coronavirus Disease 2019 agud nga maduso ro mail-in voting.
Gindugang pa kara nga maskin ro mga patay eon sa US eabi eon ro mga sa estado it New York, Los Angeles , San Francisco ag iba pa hay nakakaboto pa.
May mga kahigayunan sigon nga maskin ro mga illegal immigrant ukon mga undocumented nga mga indibidwal hay gina-usuyan it pamaagi nga makaboto.
Maskin sigon ro mga absentee ballots halin sa mga US military personnel hay ginabutangan it code rason nga sa post office pa eamang hay matumod eagi kon sin-o ro andang ginbotohan.
Sa pihak nga parte, sa mga battleground states kun sa siin hugut ro labanan hay mabudlay pa nga ma-predict kun sin-o ro magadaog sa tunga ni Trump ag Democratic challenger Joe Biden.
Samtang, ro mga ginapatigayon sigon nga survey ag pilang mga media entities sa US hay ginagamit nga propaganda machine it mga kandidato.
