KALIBO, Aklan–Welcome para sa Alliance of Concerned Teachers (ACT-Teachers) Partylist ro pahayag ni Vice Presidente ag Education Secretary Sara Duterte nga rebisahon ro K-12 program.
Suno kay ACT-Teachers Partylist Representative France Castro nga mabuhay eon sanda nga nagdihon it resolution para imbestigahan ag usisaon ro K-12 program.
Apang, nagpanawagan man raya nga dapat mai-eakip ro mga manugturo sa konsultasyon bangud sanda ro mas nakasayod kung ano ro kakueangan ukon problema sa implementasyon it programa.
Mag-euwas kara, maabu man sigon nga dapat bag-uhon kapareho it pagbalik it subject nga History bilang seperadong subject sa High School ag ro Filipino subject sa kolehiyo kamana man nga bawasan ro class size agud nga makatutok ro mga manugturo sa andang klase.
May kaangtanan kara, pabor man ro grupo nga taasan ro sweldo it mga manugturo sa nasyon.
Suno kay Castro nga dapat mag-invest ro gobyerno sa mga manugturo ag iba pang professional nga may mabahoe nga kontribusyon sa pag-umwad it nasyon.
Sa kamatuoran suno kana hay mabuhay eon ro andang proposal para himuon nga P35,000 ro sweldo it mga teacher.
