Bilog ro suporta ni Bicol Saro Party-list Representative Brian Raymund Yamsuan sa plano ni Pangueong Ferdinand “Bongbong” Marcos Jr., nga magtukod it legal department sa sueod it Philippine National Police (PNP).
Pabor si Yamsuan nga kinahangean it sangka departamento sa PNP nga magatutok sa pagbulig ag pagtau it proteksyon sa mga pulis nga ginpasakaan it kaso nga may kaangtanan sa pagtuman nanda it obligasyon.
Agud nga mapabaskog ro mandato it nasambit nga igatukod nga departamento hay ginpamilit ni Yamsuan nga dunganan raya it hugut nga pagpatuman sa paggamit it mga pulis it body camera sa pagpatigayon it operasyon.
Ginpahayag ni Yamsuan nga ro nasambit nga body-worn cameras hay magatau it proteksyon sa mga pulis kontra sa mga owa it basehang reklamo ag magamit man nanda nga ebidensya sa imbestigasyon ag pagpabaskog it ginabuytan nga kaso.
Dugang pa ni Yamsuan, mag-eowas kara hay magatau man raya it proteksyon sa mga suspek ukon target it operasyon kontra sa mga maga-abusar nga pulis.
