Bangud sa pagpanaeasa it pandemya nga COVID-19 sa nasyon, maabu ro naapektohan eabi eon gid ro Isla it Boracay nga kun siin ginasaligan ro income maghalin sa mga bisita nga turista.
Raya ro nagtueod kay Aklan 1st District Board Member Nemesio Neron para iproponer ro planong pagpatuman it visa upon arrival policy.
Suno kana nga bukon eamang sigon it Department of Foreign Affairs (DFA) ag Bureau of Immigration (BI) ro makapanipueos kara apang pati man ro mga negosyante sa Isla it Boracay.
Nagapati si Neron nga mabahoe raya nga bulig para sa mga negosyante ag sa mga pumueuyong nagatrabaho sa Isla it Boracay bangud nga mas maabu nga bisita ro maga-aeabutan.
Ginasugid nga pamaagi sa visa upon arrival policy hay mas mapadali ro pagbiyahe it mga turista nga gustong magbisita sa isla it Boracay.
Sa pihak kara, ginpaathag man kara nga kinahangean pa it maid-id nga pagtuon angot sa nasambit nga polisiya para sa mas maayos nga implementasyon kaibahan ro mga concerned agency.
Madumduman nga nauna eon nga nagproponer si Neron sa plenaryo nga magpatigayon it legislative inquiry angot sa planong pagpatuman it visa upon arrival policy sa mga dumueong nga maga-adto sa probinsya it Aklan partikular sa Isla it Boracay.
Apang sa makaron, nagapabilin nga owa pa it gintaeana nga petsa para sa nasambit nga legistlative inquiry
