KALIBO, Aklan—Gin-implementar eon ro paghukas it plastic nga nagaserbeng barriers sa mga pasahero nga nagasakay sa nagabyaheng pampublikong saeakyan.
Suno kay Roger Indaya, chairman it Makato Transport Group nga gin-impormahan sanda it Land Transportation Franchising and Regulatory Board ukon LTFRB nga pwede eon mahukas ro andang mga plastic barriers apang kinahang-ean gihapon nga makaangkon it physical distancing ro mga pasahero.
Ginklaro man nana nga uwa it pormal nga anunsyo ro LTFRB ukon uwa it sueat nga ginpapanaog para kanda kundi ginparahan eamang sanda sa daean ag gin-impormahan angot kara rason nga insigida man nanda nga ginpatuman pag-abot sa andang terminal.
Mag-eowas kara, pwede man sigon nanda nga ipatuman ro 70 porsyento nga seating capacity rason nga gilayon man sanda nga nagpanaba it pamasahe.
May kaangtanan kara, ginkalipay it mga pasahero ro sangkiri nga pagnaba it pamasahe.
Sa pihak kara, hugot man nga nagpadumdom ro LTFRB nga sundon gihapon ro naga-iral nga safety protocol agud nga inde matapnan it deadly virus nga covid-19.
