KALIBO, Aklan – – – Gaob sa mata ag lastro sa nagkaeain-eain nga parte it anang eawas ro naangkon it sangka miyembro it Armed Forces of the Philippines (AFP) nga nakabase sa Camp Jismundo Libas, Banga matapos nga kastiguhon it limang ka mga kaeaeakin-an samtang nagakaon it siopao sa sangka 24/7 nga kaean-an sa may bahin it crossing rotonda, brgy. Poblacion, Banga.
Base sa report, uwa nakabaeos ag inde eon makabilhot ro biktima nga si Corporal Edjer Villasis matapos nga ginkabuligan nga kastiguhon it mga suspek nga ginaalegar nga sambilog kanda hay sangka engineer nga nakabase sa LGU-Banga.
Ginpahayag nga off duty ro army maghalin sa sangka birthday party sa brgy. Tabaaw, Banga kat napinsaran kara nga maghapit sa nasambitang lugar agud nga magkaon it siopao.
Apang, samtang nagakaon hay gulpi eamang sigon imaw nga ginpaeapitan it mga suspek ag may nagpatungang kumusyon sa magtimbang nga parte.
Base sa bersyon it mga suspek, ginsita sigon sanda it army nga naging rason man agud anda raya nga kastiguhon.
May kaangtanan kara, ginasugid nga platoon leader ro biktima rason nga sangka platoon man it 12IB ro nagresponde sa taeatapan it pulisya agud nga usisaon ro insidente.
Nasayuran dugang nga halin sa pamilya it mga army ro biktima kon siin ap-at sigon kara nga mga igmanghod hay puro man nga military.
Ro mga suspek hay insigida man nga nadakpan ag gindaea sa Banga Municipal Police Station kon siin sanda sa makaron nakakulong para sa nagakaigong imbestigasyon ag disposisyon.
