KALIBO,AKlan– Sa sueod it haeos daywang dag-on ag limang buean nga pagserbisyo bilang hepe it Malay Municipal Police Station, igabalik eon sa national headquarters si PLt.Col. Don Dicksie De Dios.
Suno kana, sa adlaw it Biyernes ro turn-over ceremony sa panibag-ong hepe nga magadumaea sa nasambit nga taeatapan.
Angot kara, eubus ro anang pagpasaeamat sa lokal nga gobyerno it Malay, sa mga stakeholders ag sa pumueoyo nga nagsalig kana sa pagdumaea it banwa pag-abot sa peace and order.
Suno kana, imaw ro nagbuhay nga hepe sa Malay ag eubus nana raya nga ginapasaeamatan bangud nga gintaw-an imaw it awtoridad nga magdumaea ag magdisiplina sa anang mga tawo.
Samtang sa pihak nga parte, ginkumpirma ni PLt.Col. De Dios nga sambilog sa anang tawuhan hay ginaimbestigahan it internal affairs service.
Raya hay matapos nga sa kasagsagan it operasyon kontra sa tupada hay nadusmo imaw samtang naga-eagas sa mga suspek rason nga nakalabit nana ro anang service firearms ag may natamaan sa tiyan.
Apang, uwa eon sigon nagpasaka it kaso ro pamilya kontra sa nasambit nga police officer.
