Ginbalik eon it PNP-Criminal Investigation and Detection Group (PNP-CIDG) sa Sandiganbayan, agahon it Martes ro arrest warrant kontra kay dating House Speaker ag Leyte 1st District Rep. Martin Romualdez, nga nagapangatubang sa kasong plunder.
Suno sa PNP-CIDG, sa kustodiya eon nanda si Romualdez matapos maisirbi ro warrant sa Cardinal Santos Medical Center, kun sa siin, gindaea imaw ko Lunes it hapon matapos maka-eksperyensiya it cardiovascular event, bukon it stable nga blood pressure ag anxiety attack.
Kaibahan sa ginsumite nga return of warrant ro medical certificate ni Romualdez bilang pamatuod nga naiserbi eon ro warrant. Ginsumite man it pulis ro spot report, mugshot, booking form ag certificate of detention.
Ginhinyu man it PNP-CIDG sa Sandiganbayan Third Division nga isaylo sa andang kustodiya si Romualdez samtang nagapabilin raya sa ospital ag owa pa it ginapaguwa nga commitment order ro anti-graft court. Samtang, ginpahayag ni PNP-CIDG NCR chief Col. John Guiagui nga owa pa nakit-an sa andang mga dating address ro iba pang akusado sa kaso.
Ko Lunes, nagpasaka ro Office of the Ombudsman it P7.4-bilyong plunder case kontra kay Romualdez, dating House appropriations panel chairperson Zaldy Co, personal assistant ni Romualdez nga si Joselyn Tragua Serenio, ag Felicito Cristobal Guevarra, presidente it Samchan Foreign Exchange Corporation.
Sa pihak nga parte, ginhinyu ni Romualdez sa Sandiganbayan nga pasugtan imaw nga magpabilin sa ospital samtang nagapadayun ro proseso sa kasong anang ginapangatubang.
