KALIBO, Aklan–Ginakondena it Philipine National Police ukon PNP ro brutal nga pagpatay sa mag-ina ni Police Senior Master Sgt. Jonel Nuezca ko domingo it hapon sa Paniqui, Tarlac.
Suno kay P/SSgt. Jane Vega, tagapaghambae it Aklan Police Provincial Office ukon APPO nga raya ro ginbuhian nga mga pamisaean ni P/Col. Esmeraldo Osia Jr. sa anang pag-atubang kaina it agahon sa mga kapulisan sandig sa opisyal man nga pahayag it national headquarters.
Makabig sigon nga blood murder ro natabu bangud nga makita sa nag-viral nga video nga owa nagasukoe ag owa it armas ro mga biktima.
Gindugang pa ni Vega nga nataw-an eon it hustisya ro natabu ag insigidang ginpahalin sa serbisyo ro pulis matapos raya nga magsurender kabi-i.
Mag-eowas kara, ginpasakaan eon it nagakaigo nga kasong kriminal ag administratibo ro suspek.
Ginpadumdum man it APPO sa andang mga kapulisan nga pirmeng ipatuman ro maximum tolerance.
Madumduman nga makita sa video, nga viral makaron sa internet nga ginbaril it pulis ro mag-ina matapos nga ipabugae it anang unga nga babaye nga pulis ro anang ama nga ginsabat man it biktimang si sonya gregorio, 52 anyos it “I don’t care,”.
Ginasugid pa nga dati eon nga nakaangkon it banggi-anay ro magkaeapitbaeay bangud sa isyu it right of way apang naayos eon sigon it andang barangay.
