KALIBO, Aklan–Ginpaandaman it mga otoridad ro publiko kamana man ro mga business establishments nga magdahan kontra sa salisi gang nga nagapanaeasa makaron sa probinsiya it Aklan.
Suno kay P/Major Willian Aguirre it Aklan Police Provincial Office ukon APPO nga padayun ro andang pakikipag-angot sa kalibo municipal police station sa pagtumod sa identity ukon pagkatawo it mga suspek.
Mabahoe nga bulig suno kana ro mga naka-install nga CCTV cameras sa andang imbestigasyon.
Samtang, ginpahayag ni Maj. Aguirre nga kaeabanan nga gina-target it mga nagapatigayon it pickpocketing hay ro mga indibidwal nga nakitaan nanda it potensiyal eabi eon ro maabu nga suksok nga alahas.
Tambayan sigon it mga suspek nga kaeabanan nga naka-postura ro food court it mga malls rason nga dapat nga bantayan ro mga importanteng gamit.
Dapat suno kana nga magdahan ukon maglikaw sa mga crowded nga lugar ukon nagadueutdutan bangud nga dikara naga-atake ro folder gang ukon payong gang.
Kon may daeang mabahoe nga kantidad it kwarta , maggamit it sling bag nga nakabutang sa prente.
Samtang, ro pinaka epektibo sigon nga armas kontra sa mga kawatan hay ro pagiging alerto ag pag angkon it presence of mind.
Laygay pa it opisyal nga likawan ro pagsuksok it mga maeahaeon nga alahas, pagdaea it maabu nga kwarta ag iba pa.
