KALIBO, Aklan — Aminado ro PNP Highway Patrol Group ukon HPG-Aklan nga maskin paalin hay nabudlayan sanda sa ginapatigayon nga clearing operations sa mga nagapangunang karsadahon eabi eon sa national highway sa banwa it Kalibo.
Raya hay bangud sa pagiging pasaway ag owa nakikipagbueuligan ro mga motorista eabi eon ro mga tricycle driver .
Suno kay PNP-HPG-Aklan OIC head P/Sr. Master Sgt. Edmund Appelado nga kaeabanan nga nagabalik ro mga pasaway nga motorista nga naga-parking sa national highway nga nagatuga it pag-gutok it daeagan it trapiko kon owa it nagabantay.
Ginpahayag dugang nga sangkiri eamang sanda sa HPG kamana man ro pwersa it Kalibo Police Station ag Kalibo Auxiliary Police ukon KAP members rason nga indi nanda masarangan nga bantayan it 24 oras ro mga nagapangunang karsadahon eabi eon sa Roxas Avenue, Mabini St. ag Quezon Avenue paagton sa Tigayon Kalibo.
Angot kara, nagpanawagan si Appelado sa mga motorista eabi eon sa mga tricycle driver nga magsunod eamang sa batas trapiko bangud nga mabahoe ro multa engkaso nga ma-isyuhan it citation ticket it Land Transportation Office ukon LTO bangud sa illegal parking ukon obstruction ag iba pang kasunod nga mga bayolasyon nga matukiban.
Hugut sigon nanda nga ginapatuman sa mga national highway ro “no parking, no standing”.
Gindugang pa ni Appelado nga sa makaron hay naga-abot eon sa masobra sa 100 ro andang natiketan umpisa nga ginkasa ro operasyon.
