KALIBO, Aklan—Mas ginpabaskog pa it Philippine National Police-Highway Patrol Group ukon PNP-HPG ro andang operasyon eabi pa ag nagahilapit ro Barangay ag Sangguniang Kabataan election sa Oktubre 30.
Suno kay P/Lt. Col. Reynaldo Alamin it HPG-Aklan nga ro andang daily operation hay may kaangtanan sa anti-criminality campaign, implementasyon it RA 4136 ukon laye angot sa transportation ag traffic rules kamana man sa anti carnapping law.
Sa makaron hay naga-abot eon sa 10 nga saeakyan ro andang na-impound.
Sa nasambit nga numero, lima kara ro four-wheels kun sa siin ro daywa hay truck nga ginaeakipan it sangka elf ag dump truck ag lima man ro motorsiklo.
Gindugang pa ni Lt. Col. Alamin nga kapin sa 50 nga mga motorista ro andang nataw-an it temporary operators permit ukon TOP bangud sa mga nagkaeain-eain nga pag-eabag sa batas trapiko.
Kaeabanan suno kana kara hay ro unauthorized helmet, not wearing of seatbelt, unregistered vehicle ag wearing of sleepers eabi eon sa mga truck driver.
Kaibahan man kara ro illegal horn ag siren, pag-angkon it blinker, modified muffler ag iba pa.
Sa pihak nga parte, mag-eowas sa adlaw adlaw nga operasyon hay nagabuylog man sanda sa nagkaeain-eain nga municipal police stations sa pagtukod it comelec checkpoint ag oplan sita agud nga mabaeabagan ro krimen gamit ro motorsiklo ukon riding-in-tandem, gina-usisa ro pag angkon it nagakaigo nga dokumento it mga motorista ag kon nagakaigo ro plate number nga nakakabit sa andang mga saeakyan.
Samtang, dugang pa it HPG nga hugut man nanda nga ginabantayan ro mga national highways kontra sa illegal parking.
