KALIBO, Aklan–Sigidas makaron ro monitoring it Philippine National Police (PNP) angot sa mga illegal nga pagpatigayun it pagbueo-bueo ukon tupada sa mga kabarangayan.
Suno kay Police Major Bernard Ufano it Provincial Intelligence Office nga maabo sa gihapon nga mga indibidwal ro naga-eabag ag padayun nga nagaduso it illegal nga hilimuon.
Ginpasiguro man kara nga kabulig sanda it gobyerno sa pagsukoe kontra COVID-19 kamana man sa pagtapna it illegal nga sugae.
Ginpaathag man ni Major Ufano nga may limitasyon ro pagpasueod it mga indibidwal sa cockpit arena kung siin 50 porsyento eamang it kapasidad kara ro ginpasugtan.
Maskin sigon ro mga lisensyadong bueangan hay gina-monitor man nanda para masiguro ro pag-obserba it physical distancing.
Sa pihak kara, temporaryo anay nga ginsuspendi ro operasyon it mga licensed cockpit arena sa mga lugar nga una sa idaeom it Modified General Community Quarantine (MGCQ) kung siin naeakip ro probinsya it Aklan hasta Abril 4.
Raya hay sandig sa ginpagguwa nga Resolution No. 79 it Department of Trade and Industry (DTI) ag Inter-Agency Task Force.
Ro nasambit nga kasuguan hay para mapunggan ro mas pang pagkalhit it COVID-19 infection matapos ro gulpyadang pagtaas sa numero it mga nailistang kaso kada adlaw.
