KALIBO, Aklan – Hugut nga seguridad ro ginpatuman sa pag-umpisa it provincial athletic meet, adlaw it Miyerkules sa Calangcang Sports Complex sa banwa it Makato.
Suno kay P/Corporal Leonilyn Artes, tagapaghambae it Aklan Police Provincial Office ukon APPO nga nagdeploy sanda it kapulisan sa pagpanguna it Makato Municipal Police Station eabi eon sa opening ceremony agud nga magbantay sa ginatos nga mga delegado sa week-long nga sports event.
Ginpaidaeum man suno kana sa full alert status ro bilog nga pwersa it APPO.
Nagpatuman it re-routing scheme agud nga mabantayan ro daeagan it trapiko kaibahan ro force multipliers.
Maskin sa mga playing venues nga ginhiwat sa nagkaeain-eain nga banwa hay hugut nga seguridad man ro ginpatuman agud nga magtau it assistance sa mga atleta ag mga bisita.
Ro provincial athletic meet hay sangka sports event sa probinsiya nga ginapasakupan it mga atleta, coaches, ag opisyal halin sa nagkaeain-eain nga banwa sa Aklan.
