KALIBO, Aklan—Matapos ro pormal nga pagpungko ni P/Brig. Gen. Leo Francisco bilang bag-ong regional police director it Western Visayas, ginhinyu kara sa bilog nga kapulisan sa rehiyon nga ipatuman ro programa ni PNP Chief General Rodolfo Azurin, Jr. nga MKK equals K ukon Malasakit, Kapayapaan, Kaayusan equals Kaunlaran.
Suno kay P/Lt.Col. Arnel Solis, tagapaghambae it Police Regional Office ukon PRO-6 nga ginatutukan makaron it PNP ro andang papel sa komunidad agud nga maabot ro nasambit nga programa.
Ginmandu man sigon it bag-ong regional director ro pagpabaskog sa crime prevention pinaagi sa mga operasyon, pagtapna sa mga krimen pinaagi sa intelligence gathering, madasig nga pagsolbar sa mga krimen pinaagi sa maid-id nga imbestigasyon, madasig nga pagsabat sa police assistance ag iba pa.
Mag-eowas kara, ginhinyu man kara ro kooperasyon it komunidad para sa crime prevention ag crime solution efforts.
Maga dere-deretso man suno kana ro kampanya it PNP kontra sa illegal nga droga, loose firearms, wanted persons , illegal gambling ag iba pa.
Si P/Brig. Gen. Francisco nga tubong Marinduque ro nagbueos kay P/Brig. Gen. Flynn Dongbo matapos nga gin-reshuffle it PNP chief ro haeos tanan nga mga police generals nga nagabuyot sa mga nagapangunang posisyon.
Nagtapos imaw sa Philippine Military Academy class of 1992 ag maabu eon man nga posisyon ro nabuytan eakip ro operational ag administratibo nga trabaho.
Antes nga na-assign sa western visayas, naging district director si Francisco it manila police district ag deputy regional director for administration it PRO-3.
