KALIBO, Aklan — May lead eon ro Balete Police Station sa pagbaril sa mag-asawa samtang sakay it baroto ko Sabado it gabii sa Sitio Mapait, Brgy. Aranas, Balete, Aklan.
Nakilaea ro mag-asawang nga sanday Jorge Concepcion Valencia, 59, ag Vilma Edayan Valencia, 47, puro mga residente it nasambit nga lugar.
Base sa imbestigasyon it kapulisan, matapos nga ihatud it mag-asawa ro andang kumpare sa Sitio Maeobog, Brgy. Calizo, Balete samtang sakay it baroto hay may andang haagyan nga mga salingsing sa tubi.
Agud nga indi masamad ro elise it andang baroto hay andang ginpaeong ro makina ag nagbugsay.
Apang gulpi sanda nga nakabati it eopok, nga kon sa siin hay nagpaiwag ro misis gamit ro flashlight. Bangud kara, uman sanda nga binaril ag naigo ro mister sa tuo nga parte it buli ag nadaplisan man ro misis sa waea nga le-og.
Maskin parehong may tama it bala it ginapatihan nga .38 kalibre nga baril, nag-eumpat ro mag-asawa sa baroto ag gin-guyod maeapit sa sangka baeay sa kilid it suba ag nagpangayo it tabang.
Insigidang gindaea ro mga biktima sa sangka pribadong ospital nga padayun makaron nga ginabueong.
Dating banggi-anay ro ginapanan-aw nga rason it insidente.
