KALIBO, Aklan—Ginapatuman makaron it Philippine National Police ro localization program kon sa siin ro mga PNP personnel hay mismong sa andang kaugalingon eon gid nga banwa magaserbisyo.
Suno kay P/Capt. Aubrey Ayon, tagapaghambae it Aklan Police Provincial Office nga katuyuan kara nga mapabaskog ro andang moral ag welfare bangud nga manami gid sa pamatyagan kon nagaserbisyo ro mga kapulisan sa kaugalingon nga lugar.
Ginklaro ni P/Capt. Ayon nga bukon raya it kaparte sa andang preparasyon sa paaeabuton nga 2025 midterm elections.
Sa oras suno kana nga maidentify nga ro sangka police personnel nga may pamilya ukon himata nga nagapadaeagan sa maabot nga eleksyon hay pagasundon gihapon ro nakaangdan nga sistema ukon patakaran nga iga-reshuffle sanda sa ibang police station nga maeayo sa andang pamilya nga nagapailihir sa anuman nga posisyon.
