KALIBO, Aklan—Uman nga nagpaandam ro kapulisan sa naga-inabu nga nagiging biktima it online banking fraud sa nasyon.
Raya matapos nga sangka 52-anyos nga negosyante sa banwa it Kalibo ro nagdangop sa Kalibo Municipal Police Station matapos nga mabiktima it sindikato nga eakot sa pagpanakaw it kwarta sa mga bank account it mga private individuals.
Suno kana nga ulihi eon nana nadiskubrehan nga nabawasan it kapin sa P38,000 ro sueod it anang bank account.
Sa pag-usisa nana sa bangko, nakita sa anang bank statement nga sunud-sunod ro gin obra nga transaction, Miyerkules nga adlaw, Nobyembre 15, 2023, kun sa siin daywang beses nga naka-withdraw it tig-P19,000.
Suno sa biktima nga may nagtawag kana nga sangka eaeaki nga nagpakilaeang ahente it sangka bangko nga may sanga sa Makati City angot sa pag-waive sa deduction it anang yearly maintenance sa credit card.
Agud nga mapaathag kana it husto kon paalin nga maisaylo ro reward pinaagi sa sangka online payment app, gintau it eaeaki ro telepono sa sangka babaye nga nagpakilaea man nga branch manager it nasambit nga bangko.
Sa andang pag-istorya, dikara naitau it biktima ro anang One Time Pin (OTP) nga hugut nga ginapadumdum nga indi ipahisayod sa maskin kanyoman.
Matapos nga magduda bangud sa sunud-sunod nga nabaton nga OTP sa anang cellphone, nagreklamo ro biktima sa bangko kun sa siin natukiban ro insidente rason nga temporary anay nga gin-cut-off ro anang account.
Bangud sa nagahaba nga listahan it mga biktima, nauna eon nga nagpaandam ro PNP-Regional Anti-Cybercrime Office 6 angot sa online banking fraud.
Raya hay nagakahueugan sigon nga na-access ukon nabuksan it kawatan ukon sindikato ro bank account it sangka depositor ag nag-transfer it kwarta nga owa it pahanugot sa tag-ana.
Kon makabaton sigon it mga tawag halin sa nagapakilaeang taga-bangko, dikara eon mag-andam.
Indi basta-basta nga itau ro mga importanteng impormasyon.
Samtang, ro iba pang style it mga bank fraudster hay gina-send ro link pinaagi sa text message, kun sa siin ro tawag kara hay smishing.
Kun sa email man sanda nag-send it link ro tawag kara hay phishing.
Kamana man kun QR code man ro andang ginatau, ro tawag kara hay quishing.
Engkaso sigon nga makabaton kara, indi pagbuksan ag paea-on eagi agud nga indi mabiktima it mga sindikato.
