Nakatutok makaron ro Philippine National Police (PNP) sa sangka area sa sueod it Kingdom of Jesus Christ (KOJC) compound kon sa siin naka-detect sigon sanda it heartbeat 20-30 meters halin sa eogta gamit ro ground breaking penetrating radar.
Suno kay PNP Spokesperson Col. Jean Fajardo, ginagamit nanda ro nasambit nga detector sa kada search and rescue operations kon may kalamidad ag nagausoy it sign of life.
Nabatyagan sigon it PNP nga ginapunggan sanda it mga taga suporta ni Quiboloy nga makapaeapit sa nasambit nga area nga andang ginatutukan.
Ginapatihan it PNP nga sa underground nagapanago ro puganteng pastor nga si Apollo Quiboloy ag ro mga kapareho kara nga akusado.
Kasunod kara, ginpasiguro ni Fajardo nga maeapit eon lang nanda matunton ro secret entrance it nasambit nga underground.
