KALIBO, Aklan–Gintaw-an eon it “go signal” it PNP Regional Civil Security Unit 6 ro mga vendors it paeupok nga makabaligya sa probinsiya it Aklan.
Suno kay P/SSgt. Jane Vega, tagapaghambae it Aklan Police Provincial Office ukon APPO nga raya hay matapos nga ginpaguwa eon ro andang retailer’s permits para sa andang pagbaligya it firecrackers.
Madumduman nga nauna eon nga ginpahayag it Bureau of Fire Protection ukon BFP-aklan nga 23 nga firecracker retailers halin sa Numancia, Tangalan, Altavas, Malinao, ag Balete ro naka-kompleto it andang aplikasyon sa special permits.
An-um nga iba pa halin sa banwa it Kalibo ro nag-proseso man it andang permits ag posibleng naitau eon man.
Gindugang pa ni Vega nga matapos aprubahan it natungdan nga lokal nga gobyerno, pila sa mga vendors hay nakapatindog eon it andang stalls sa mga gintaeana nga firecrackers zone sa andang lugar samtang ro iba hay owa pa.
Ginapasugtan ro mga raya nga maka-display ag makabaligya it mga paeupok hasta sa Disyembre 31.
Ro mga madakpan nga nagabaligya it firecrackers ag pyrotechnics sa guwa it gintaeana nga lugar hay pagakabigon nga violators ag pagakumpiskahon ro andang mga baligya ag posible pa nga pagakasuhan.
Mag-eowas sa retailers ag mayors permit, obligado man sanda nga magbo-oe it permit to transport.
Ginapasugtan eamang nga ibaligya it mga raya ro legal nga paeupok.
Ro mga illegal nga paeupok hay ginaeakipan it Super Lolo, Goodbye Earth, Five Star, whistle bomb, atomic triangle, piccolo, watusi, bogo, ag pla-pla.
Kaibahan man sa bawae makaron ro torotot bilang paglikaw sa pagkalhit it COVID-19 infection.
