KALIBO, Aklan–Uman nga nagpaandam ro Philippine National Police-Anti Cybercrime Group sa publiko nga indi basta-basta nga magpati sa mga nagakalhit makaron nga text scam eabi eon nga nakabutang ro pangaean it mga recipients ukon subscribers.
Suno kay P/Cpl. Emeritu Frutas, Jr. it Regional Anti-Cybercrime Unit 6 nga maabu nga factors kon ham-an nga nakakaangkon it access ro mga scammers sa numero it mga subscribers partikular sa ginatawag nga SMS spoofing.
Mag-eowas nga nababakae nanda sa black market ro personal mobile number eabi eon it mga kilaeang personalidad, may kahigayunan nga gina-post it ibang biktima ro andang numero sa FB account.
Nagapati man imaw nga naga-leak ro mga impormasyon bangud nga owa na-dispose it maayos ro pangaean ag numero it mga biktima nga ginalista kon nagasueod sa mga malls ag iba pang mga establisimento.
Raya sigon ro pila sa mga rason kon ham-an nga ro telephone number hay may mga pangaean eon sa text scam.
Sa makaron hay gina-imbestigahan eon it kapulisan kaibahan ro National Telecommunication Commission, National Privacy Commission ag mga service providers ro insidente partikular ro pagtumod kon sin-o ro sa likod kara.
Nag-abiso man imaw sa mga makabaton it scam messages nga indi pagbuksan ukon i-click kamana man nga mag-rehister sa mga ginapadaea nga phishing link bangud nga dikara eon maga-umpisa ro scam.
Umpisa Agosto 1 hasta 31, kapin sa 28 nga biktima ro nagpaabot it reklamo sa andang taeatapan.
Sa idaeum it RA 10173 ukon data privacy act, may saeabton sa laye ro sin-o man nga nagapaguwa it pribadong impormasyon it sangka inbidwal.
Nauna eon nga nagpaandam ro PNP-ACG sa publiko angot sa mga text scams nga nagatanyag it trabaho nga may kabaylo nga mabahoe nga sweldo ukon nagdaog it pa-premyo.
