KALIBO, Aklan—Ginsuhestiyon it Philippine Nuclear Research Institute (PNRI) nga oras eon agud nga bag-uhon ro mga laye ag mapasugtan nga makaangkon it nukleyar sa nasyon.
Suno kay Raymund Jacinto Sucgang, Supervising Science Research Specialists it PNRI sa makaron nga paniempo hay masyadong kueang ro ginatawag nga energy mix sa Pilipinas.
Indi sigon raya makasarang agud nga magtau it nagakaigo nga supply it kuryente sa nasyon.
Dugang pa ni Sucgang nga mabahoe nga bulig ro pag angkon it nuclear energy sa presenteng ginagamit nga energy mix nga gina-eakipan it wind, solar, geothermal ag iba pa.
Ginagamit sigon raya sa mga maumwad nga nasyon kapareho it Japan, Estados Unidos ag sa Europa.
Sambilog man sigon raya sa mga sabeag sa pag-umwad it nasyon.
Samtang, ginpahayag ni Sucgang nga kabaliktaran sa gina-isip it kaabuan nga pagpatindog it mabahoe nga nuclear power plant nga maga-supply it kuryente sa bilog nga nasyon, ro ginasuhesiyon makaron it mga ekspero hay ro pagtukod it mga maisot nga planta sa kada rehiyon.
Mas maeumo ag eowas sigon nga dumaeahan ro mga modular power generators nga ginapadaeagan it nukleyar.
