Maniwang ag dehydrated eon ro sangka Polar bear kat masalbar sa Dikson, Russia.
Naninahan ro dila it sapat kat maigpit sa lata it gatas nga posibleng nakita nana sa basurahan kat mag-usoy it makaon.
Nagpangayo it bulig ro mga residente kat makita ro babayeng oso nga ginatantiyang daywang dag-on ro edad samtang nga nagalibot-libot sa andang lugar ko nagtaliwan nga domingo.
Sangka grupo halin sa Moscow Zoo ro nag-agto sa lugar ag gin-usoy ro oso.
Kat makita, gingamitan nanda it tranquilizer ro sapat agud nga makatueog ag mabo-oe ro mataeum nga lata nga nakaigpit sa anang dila.
Ginbueong man ro anang nina sa dila ag ginaeauman nga magamayad sa mas madali nga tiempo.
Suno kay Svetlana Akulova, director general it Moscow Zoo, ro masunod nga tikang sa rescue mission hay ro recovery it oso halin sa anaesthesia.
Nauna eon nga nagpaandam ro sangka grupo it Canadian ag U.S. scientists angot sa naga-inabu nga mga nagutuman nga polar bear nga naga-usoy it makaon sa mga basurahan.
Raya hay nagakatabu bangud sa pagkaduea sigon it andang icy habitat tuga it nagakatabu nga climate change.
Gindugang pa it mga eksperto nga nagiging paeag man sa kaeowasan it mga polar bear ro mga basura it tawo, partikular sa mga landfill nga maeapit sa northern communities it Russia, Canada ag Alaska.
